एकटा..

प्रत्येक 'त्या'च्या हातात कोण्या 'ती' चा हात आहे.
प्रत्येक 'त्या'ला कोण्या 'ती' ची साथ आहे.
मी एकटाच अजुनी या संभ्रमात आहे.
कोण आहे ती? जी माझ्या नशिबात आहे.
काही जण असतातच कमनशिबी असे ऐकिवात आहे.
मी ही त्यातलाच एक, नवल काय त्यात आहे?
पण एके दिवशी ती नक्की भेटेल, जिच्या मी शोधात आहे.
तोपर्यंत तरी एकट्यानेच चालायची ही वाट आहे..

कुरुक्षेत्र...

अगणित झाले वार जरी, छातीवरी झेलायचे,
ऊठ पुन्हा पेटून गड्या, तुज उत्तर आहे द्यायचे.

प्रेमगीते, भावगीते तुजसाठी बनलीच नाही,
तुजसदा त्वेषाने हे समरगीतच गायचे.

जीवनाच्या कुरुक्षेत्री, भावनांना स्थान नाही,
आप्तांवरती बाण रोखून, तुज अर्जुन आहे व्हायचे.

पाप-पुण्याचा हिशोब, कर येथेच चुकता,
तुज तुझे गाऱ्हाणे ना दैवादारी न्यायचे.

शपथ तुला लखलखणाऱ्या तलवारीच्या पात्याची,
हरलास ही लढाई जरी, तुज युद्ध आहे जिंकायचे.